Ina cronica d'in quasi naufragi
Emoziuns, discussiuns, cumbats gea schizunt profunds stgarps entaifer famiglias ha el chaschunà, il rumantsch grischun. Stgaffì el ha il romanist da Turitg, professer Heinrich Schmid, il 1982 sin incumbensa da la Lia Rumantscha.
L'idea da principi era da stgaffir in rumantsch da scrittira unifitgà. Il pass da la lingua da standard en scola ha chaschunà las pli grondas e fermas emoziuns e discussiuns entaifer la rumantschia dapi decennis. Il punct da partenza per quest svilup è enturn l'onn 2000.
Ils cuntegns da la cronica...
Derivan d'ina vart dals "Fatgs" da la Lia Rumantscha (versiun 2015), da l'autra vart da l'archiv RTR.
La cronica interactiva mussa ina selecziun da var 50 contribuziuns radio e televisiun or da passa 600 contribuziuns tar il tema rumantsch grischun.
Er intginas communicaziuns da medias da la Lia Rumantscha han servì sco funtaunas
La carta d'introcuziun e return
Las datas d'introducziun dal rumantsch grischun en scola èn documentadas cleramain. Quellas dal return als idioms però betg tuttas.
Las bleras vischnancas han decidì l'onn 2011 da reintroducir l'idiom. Tschertas èn dentant daventadas part d'ina vischnanca fusiunada dapi l'introducziun dal RG en scola. Plinavant n'èn las decisiuns da turnar a l'idiom betg adina stadas decisiuns a l'urna, mabain per part er decisiuns entaifer il cussegl communal u quel dal consorzi da scola. Per quels motivs n'èn las datas dal return betg tuttas documentadas exact, er betg tar ils responsabels dal chantun. Ellas sa basan per part sin retschercas en l'archiv dad RTR.